PONTEVEDRA, CAPIZ– Patay ang tag-iya sang isa ka furniture shop matapos ginluthang kahapon nga adlaw sang aga sa banwa sang Pontevedra.
Ang biktima amu si alyas “Lorenzo” yara sa legal nga pang-edaron kag residente man sang nasambit nga lugar.
Sa interview sang Bombo Radyo kay Police Major Anthony Salbang, Hepe sang Pontevedra Municipal Police Station, ginapahayag sini nga nakabaton sila sang report nga kun sa diin may yara sang nagluntad nga shooting incident sa Barangay Rizal, Pontevedra, Capiz.
Base sa ginpatigayon nga imbestigasyon sang mga kapulisan, nag pakuno-kuno suno diri ang suspek nga costumer kun sa diin nag pamangkot ini kun pila ang presyo sang pirtahan bangud ini ang magabakal.
Dugang pa nga sang nagtalikod ang biktima agud magkuha sang papel para sa resibo, hinali nalang ini ginluthang sang makalima ka beses sang amu nga suspek.
Bangud sa natabo nga pagpangluthang, nag-angkon sang patal nga mga pilas sa likod ang biktima nga amo ang gintunaan sang iya kamatayon.
Madasig naman nga nagpalagyo ang suspek padulong sa direksyon sang President Roxas padulong sa banwa sang Pilar.
Samtang, ginapahayag naman sang mga nakakita nga wala sang suksok nga helmet ang suspek kag nakasakay sa iya motorsiklo.
Sa karon, yara na ang bangkay sang biktima sa punerarya sa nasambit nga banwa kag nagapadayon pa ang imbestigasyon sang mga kapulisan agud mahibaloan kun ano ang motibo sang suspek sa pagluthang-patay sa amu nga biktima.
