ROXAS CITY – Pigado na ang income kag wala na sang ginapuli sa pamilya ang mga trabahante bangud sa wala na sang suplay sang balas sa syudad sang Roxas.
Ini ang ginpahayag ni Mr. Regie Bacud, gravel and sand owner sang mainterview sang Bombo Radyo.
Suno diri, sumugod nag-untat ang quarry, wala na siya sang mabaklan sang suplay sang balas kun sa diin ginakuha niya pa ini sa banwa sang Panit-an, Dumalag kag Dao.
Problemado man si Bacud bangud damo na ang naga-order sa iya ilabi na ang gapakay-o sang mga balay.
Naluoy man siya suno diri sa iya mga trabahante bangud ini lamang ang ila pangabuy-anan gani ginpakamaayo sini nga dal-on sa iya maisan ang mga ini agud maka-extra trabaho kag may madala bisan paano sa ila tagsa ka pamilya.
Apang indi niya masiguro kun tubtob san-o ang iya masarangan nga mabuligan ang iya trabahante bangud siya man ang nadulaan sang iya pangabuy-anan.
Luyag sini ipalab-ot kay Governor Fredenil “Oto” Castro nga kuntani mabalik na ang suplay sang balas agud magbalik man ang ila pangitan-an.
