PONTEVEDRA CAPIZ – Personal nga nagpadulong sa talatapan sang Bombo Radyo, ang isa sa mga tag-iya sang National Housing Unit sa Barangay Rizal, Pontevedra, Capiz agud idangop ang ginapahayag pagpaistar sang iban nga pamilya sa ila puluy-an apisar nga may kompleto sila nga mga dokumento.
Sa interview sang Bombo Radyo kay alyas “May”, yara sa legal nga pang-edaron, nagahilibion nga ginpahayag sini nga sadtong tuig-2023 una sila nga naghinala ni Mr. Bongbong Britanya una nga tag-iya sang unit may kaangtanan sa ila sitwasyon apang ginkuha lamang sini suno diri ang ila cellphone number kag nagpromisa nga pagataw-gan o galing sila kag hatagan sang bag-o nga unit.
Apang tubtob subong nga tuig-2025 wala sa gihapon sila suno diri sang may nabaton nga tawag ukon mensahe kabangdanan nga nagdesisyon na lamang sila nga magpadulong sa ila munisipyo agud kuntani magpangayo sang bulig bangud wala na sila sang pulian matapos nga may naga-istar na sa ila puluy-an.
Mahibaluan nga naglakat padulong sa Maynila ang ila pamilya agud ipabulong ang iya sini nga manghod bangud sa sakit nga ginasupreher.
Suno diri nga base sa ila nakaistorya nga empleyado sa munisipiyo, wala sila sang mahimo bangud ang makapahalin lamang sa naga-istar sa ila unit amu si Mr. Bongbong Britanya bangud ginapahayag nga iya ini mga tinawo.
Pangabay sang tagreklamo nga hatagan sila sang nagakaigo nga sabat kung bala ila pa makuha ang amu nga unit ukon indi kag indi na sila pagpabudlayan pa kag pasaligon sa wala lang.
Dugang pa sini nga sang tion nga yara sila sa Maynila, wala man lang sila nakabaton sang tawag bilang abiso nga may yara na sang bag-o nga maga-istar sa amu nga unit.
Ginklaro man ni alyas “May” nga wala nila ginparentahan ukon ginabaligya ang unit sumugod nga naglakat sila.
