ROXAS CITY-Nagpaandam ang tag-iya sang Capcor Motors Corporation nga pasakaan sang panumbongon ang alkalde sang banwa sang Mambusao sa tion nga indi sini mabayaran ang balanse sa ginbakal sini nga mga truck sa nasambit nga baligyaan.
Sa interview sang Bombo Radyo kay Mr. Romulo Capunong nga nagpadulong sa iya si Mr. Isidro Labao, gumangkon ni Mambusao Mayor Leodegario Labao agud magbakal sang duha ka mga dalagkuan nga mga salakyan.
Suno kay Capunong ang isa ka salakyan ang nagabalor sang P2.4 milyones kag isa naman ang nagabalor sang P3.4 milyones.
Dugang pa ni Capunong nga nakabayad man sang kapin P4 milyones si Labao apang may yara pa sang kulang nga balayran ang nasambit nga alkadle.
Makatatlo ka beses suno diri nga nagpadala sang demand letter si Capunong sa alkalde apang isa gid lamang ka beses nabaton sini ang sulat.
Dismayado man ini matapos nga ginhatagan ini sang talbog nga tseke ni Labao nga pambayad kuntani sa nabalin nga balanse.
Bangud diri, ginpaandaman naman sini si Labao nga pasakaan sang panumbungon sa tion nga indi sini mabayran ang kapin P3.4 milyon nga utang sini.
Matandaan nga magaduha na katuig nga nagahulat sang bayad si Capunong gikan kay Labao.
