ROXAS CITY – Ginklaro sang isa ka nagapanag-iya sang unit sang National Housing Authority (NHA) sa Poblacion Ilaya, Panay, Capiz nga wala sini niya ginbringka ang pwertahan sang ila puluy-an agud nga makasulod, matapos nga ginsaraduhan ini sang Local Government Unit (LGU) kag NHA sa nasambit nga banwa.
Sa interview sang Bombo Radyo kay Nanay alyas “Nene”, ginpahayag sini nga sang tion nagpadulong ang opisyales sa ila lugar yara sila sa syudad sang Roxas agud nga ipabulong ang iya bana.
Apang, ginklaro sini nga madugay na sila nga nagapuyo sa amu nga lugar kag sa pagkamatuod suno kay Nanay Nene masobra 6 na sila ka tuig nga naga-istar diri.
Gani tuman na lamang ang iya kakibot sang nagpauli ini sang makit-an nga ginsaraduhan kag ginbutangan sang poster ang ila balay.
Suno kay Nanay Nene, sumugod nga ginhatag ini sa ila gintinguhaan ini nila nga ipakay-o kag magpundar sang gamit ilabi na ang iya bana.
Dugang pa sini nga kun tani, indi mausik ang ila gintimakasan agud nga mapanami ini kag may yara sang koportable nga mapulian ilabi na subong nga may ginasupreher nga balatian ang iya bana.
