ROXAS CITY – Nag-apelar ang tag-iya sang Mustang sang paghangop kag kalinong matapos ang aksidente sa dalan nga natabo sa tunga sang iya salakyan kag sang isa ka motorsiklo kahapon sa Pueblo de Panay.
Sa iya statement, ginpahayag ni Atty. Kim Kervin Bonite nga siya mismo ang nagamaneho sang Mustang sang natabo ang aksidente.
Nagpasalamat ini sa Diyos bangud wala siya napilasan, samtang minor abrasions naman ang naangkon sang nagamaneho sang motorsiklo.
Suno kay Bonite, dako ang damage sa iya Mustang, nga iya ginakabig nga isa ka “beloved, hard-earned” nga salakyan nga iya masami ginamaneho sang maayo kag may paghalong.
Suno pa sa abogado, ginpahayag mismo sang motorcycle rider pagkatapos sang aksidente nga wala na siya makapahinay bangud malapit na ini sa Pueblo Rotonda kag madasig ang iya pagpadalagan.
Padulong ini kuntani sa isa ka mall.
Ginpahayag man ni Bonite nga base sa mga impormasyon nga ila nakuha kag na-dokumento pagkatapos sang aksidente, ginapahayag nga wala sang driver’s license ang motorcycle rider kag ang motorsiklo nga iya ginamaneho ginhulam lamang sa iya abyan kag wala man marehistro.
Apang apisar sa natabo, ginpahayag ni Bonite nga nagdesisyon sila sang motorcycle rider kag sang pamilya sini nga husayon ang insidente sa malinong kag respetado nga pamaagi.
Suno sa iya, mas importante nga hangpon anay ang sitwasyon kag ang mga sirkumstansya sa likod sang aksidente, sa baylo nga magdali sa kun sin-o ang matudlo nga basulon.
Pahayag niya, dapat mangin pahanumdom ini sa tanan nga nagagamit sang dalan nga maghalong, magsunod sa traffic laws kag mangin responsable sa pagmaneho.
“What truly matters is that I am okay, and the motorcycle rider is alive and well,” suno sa iya, kag ginpahayag nga ang salakyan mahimo pa nga mapakaayo ukon mabaylohan, apang ang kabuhi sang tawo indi mabaylohan sang bisan ano.
“Let us all drive safely, obey traffic laws, and always remember that every person we meet on the road is someone’s family, someone’s friend and someone’s loved one,” dugang sang natungdan.
