ROXAS CITY – May pagduda ang tag-iya sang nasunog nga balaligyaan sang pinta sa Km. 1, Barangay XI, sini nga syudad, nga may posibilidad nga may gintuyo kawatan antes ginsunog ang ila store.
Ini ang ginpahayag ni Mr. Darwin Cadiz, sang exclusive nga mainterview sang Bombo Radyo.
Suno diri, ba-se sa panaysayon sang babayi nga una nakalabay kag nakakita sang nagasugod palang ang sunog, ginapahayag nga sa kilid sang ila balaligyaan nagsugod ang kalayo.
Sa iya nga pagtsekyar, may nakita ini nga buho sa ila atop nga mahimo makaigo ang tawo.
Ginaalegar sini nga bangud ginkawatan na sang-una nga tuig ang ila balaligyaan pinaagi sa pag-buho sang atop nga nagserbe entry-point sang mga kawatan, suno diri nga indi man ini malayo nga matabo sa karon.
Apang bangud wala sang makuha nga cash ang mga posible kawatan, ginaalegar nga ila ini ginsug-an.
Nahibaluan nga Domingo sang hapon, wala na sang tawo ang amu nga store bangud nag-half day lang ang mga ini sa trabaho kag ginsiguro sini nga naga-switch off tanan nga suga kag gamit sa ila balaligyaan.
Ginsiling man ni Cadiz, nga ginatugyan sini sa mga katapo sang BFP-Roxas City ang imbestigasyon kag ang iya nga alegasyon ang ba-se lamang sa insidente sang pagpangawat sang nagligad sa ila puwesto.
Matandaan nga naubos ang ila tanan nga baligya nga pinta nga ginabulubanta ba-se sa inisyal nga pagtsekyar, kapin P2 million ang amu nga kahalitan.
Partially burned naman ang amu nga edipisyo matapos nga gilayon nakapadulong sa lugar ang katapo sang bumbero.
