Nagpangayo sang pasaylo sa Land Transportation Office (LTO) Region 6 ang tag-iya sang tricycle sa Roxas City bangud sa pagpahanugot sa ginabanta tatlo ka tuig nga bata nga mag-drive samtang gina-video ini kag gin-post pa sa social media.
Sang tinalikdan nga semana, natigayon ini nga ginserbehan ang show cause order sang ahensya.
Sa interview sang Bombo Radyo kay Atty. Gaudioso Geduspan II, Regional Director sang LTO 6, iya ginpahayag nga paglapas sa Presidential Decree No. 603 ukon The Child and Youth Welfare Code kag Republic Act No. 7610 ukon Special Protection of Children Against Abuse, Exploitation and Discrimination Act ang ginhimo sa bata.
Sa sabat sang tag-iya sang tricycle, iya ginpahayag nga kalingawan lamang kuntani ang amo nga video apang gin-ako sini nga wala niya makonsidera ang posible peligro kag legal implications.
Gin-delete naman sang tag-iya ang video apang nagapati ini nga madamo na ang nag-save kag nag-reupload.
Nagpahanumdom ang regional director sa publiko nga ang nasambit nga insidente ang wala ginatolerar sang ahensya ilabi na ang mga videos nga ginakabig karadlawan sa social media kag nagalapas sa layi amo man nga naga-involve sang reckless act.
