Natalana nga pasakaan sang kaso nga murder ang ginatudlo suspek sa pagbuno-patay sa 14-anyos nga dalagita sa Barangay Poblacion Sur, Ivisan, Capiz.
Sa interview sang Bombo Radyo kay Police Major Ruby Magallanes, hepe sang Ivisan Municipal Police Station, suno diri kun paga-basehan ang pilas nga naangkon sang biktima nga si alyas ‘Angel’, nagaguwa nga may kaakig ang suspek nga si Louie Lipalim kag wala sang pagpangduha-duha sang ginhimo ang krimen.
Mahibaluan, magluwas sa pilas sa likod tuga sang pagpangbuno, daw halos mautod na ang kamot sang biktima bangud ginlabo pa ini gamit ang binangon.
Suno kay Magallanes, nagaguwa sa imbestigasyon sang kapulisan nga tuman ang kaakig nga nabatyagan sang suspek bangud ginapasibangdan sini ang biktima nga amu ang nagkawat sang iya kwarta.
Natigayon naman nga maaresto ang suspek kag gindala sa ospital matapos nga ginapahayag nagtuyo utason ang kabuhi pinaagi sa pag-inom sang hilo.
Sa karon, yara na sa istable nga kondisyon ang suspek kag nagapabilin sa ospital.
Samtang, ginahikot naman sang mga kapulisan ang mga nagakaigo nga dokumento agud mapasaka na ang kaso batok kay Lipalim.
