ROXAS CITY – Daplis sa nawong kag pilas sa kamot ang naangkon sang isa ka lalaki matapos nga gintuyo sini nga punggan ang pagpanglabo sang nagsugod nga lalaki sa ila balay, sa Barangay Binuntucan, Pontevedra, Capiz, Sabado sang gab-i, Hunyo 25.
Ginkilala ang biktima kay Jonathan Agris, 29-anyos.
Samtang ang suspek ang ginkilala kay Eric Dais, 40-anyos, fishpond caretaker, nga lunsay mga residente sang nasambit nga barangay.
Sa inisyal nga imbestigasyon ni PSSgt. Rhea Batuigas, imbestigador sang Pontevedra MPS, nagaguwa nga nakabugtaw sa iya katulogon ang biktima bangud sa nag-abot nga suspek nga may bitbit nga binangon.
Ginpahayag nga nagpanghana nga magpanglabo ang suspek rason nga gilayon gin-agaw sang biktima ang binangon, apang nag-angkon ini sang kapilasan.
Nahibaluan nga ang utod kuntani sang biktima ang tuyo nga komprontahon sang suspek.
Nagpadulong sa Bailan District Hospital ang biktima kag madason nga ginreport sa kapulisan ang insidente.
Wala man madakpan ang suspek, tubtob sa karon nga aga.
