ROXAS CITY – Ginpalab-ot na sang tagdumalahan sang Roxas City Integrated Transport Terminal (RCITT) sa City government ang pag-aksyon sa problema sa layaw nga ido sa amu nga terminal.
Ini ang pahayag ni Mr. Victor Arcenas, administrador sang nasambit nga terminal, sang mainterview sang Bombo Radyo.
Suno pa diri, may yara na sang ordinansa nga ginpapasar ang lokal nga gobyerno sang syudad angut sa mga layaw nga ido, gani igatugyan nalang sini sa nasambit nga opisina ang ginpalab-ot nga concern sang isa ka pasahero natuhoy sa pagnilapta sang mga kasapatan sa terminal.
Ginpahayag man sini nga bilang aksyon sa ila nga bahin, ginmanduan na sini ang nagapanglimpyo sa amu nga terminal nga pangtabugon nalang ang mga ido nga nagapadulong diri, subong man sa mga tag-iya sang karinderya nga indi nalang pagbahugan agud indi magamon.
Sa pihak nga bahin, ginsiling ni Arcenas nga gin-repair na sa karon ang Comfort Room sang lalaki.
Samtang, ginpakigbahin man sini nga medyo nagdako ang kita’ sang terminal sa karon nga tion, kun sadto anay nagakita sang P15,000 kada adlaw, sa karon nagakita na ini sang P17,000 tubtob P25,000.
