ROXAS CITY – Ginklaro sang tagdumalahan sang Sapian National High School ang alegasyon nga indi pagpasulod sa ila mga estudyante nga wala nagasuksok sang school uniform.
Sa pagpadulong sang Bombo Radyo sa nasambit nga eskwelahan, ginpahayag nanday Mr. Allan Vestidas, security guard kag Ms. Griely Obligacion, Guidance Counselor, nga wala sang kamatuoran ang ginpalab-ot sang pila ka mga estudyante nga wala sila ginpasulod sa gate bangud lamang wala naka-school uniform.
Ang matuod nga natabo suno sanday Vestidas kag Obligacion nga kahapon sang aga, na-delay lang ang mga estudyante sa pagsulod bangud ila gina-id-iran ang pagtsekyar sa mga bag kag pagkakilanlan sang mga estudyante, kag ginalikawan nga magdala sang mga matalom nga bagay, matapos ang natabo nga ‘rambol’ sang nagligad nga semana nga ginkaulamiran sang ila estudyante kag outsider.
Aminado sang security guard nga gin-una niya pasulod ang mga naka-uniporme kag ginpahulat sa guwa ang mga naka-sibilyan bangud tuyo sini nga pahibaluon ilabi na ang mga kababainhan nga magsuksok sang mga desente nga panapton.
Apang, wala sini natalupangdan nga tinak-an na kag nagpauli nalang ang iban nga nagpilila nga kabataan.
Wala man suno diri sila naghambal nga ‘No Complete Uniform, No Entry’ sa masunod nga inadlaw, bangud ginasunod nila ang mandu ni VP kag DepEd Sec. Sara Duterte nga indi pag-obligahon ang estudyante nga magsuksok sang complete uniform, apang kuntani magpili sang desente nga pormahan.
Paalinton sang Sapian NHS nga ang ila lamang tinutuyo amu ang proteksyunan ang ila mga estudyante batuk sa kinagamo apang wala maghuna-huna nga wala ini maintindihan sang mga kabataan kag nagpalab-ot sang reklamo sa kahanginan.
