ROXAS CITY – Ginakabig nga daku nga kakulangan na sa Department of Social Welfare and Development (DSWD) ang pagreject sa appointment ni Secretary Judy Taguiwalo sang Commission on Appointment (CA).
Sa interview sang Bombo Radyo kay DSWD Undersecretary Hope Hervilla, ginpahayag sini nga ginkasubo sang mga empleyado sa ahensiya ang nangin desisyon sang CA, bangud ginbuy-an ang isa ka opisyal nga sinsero nga magserbisyo sa mga pigado nga mga pilipino.
Ginlaragway man ni Hervilla si Taguiwalo nga lider nga wala nakapoy sa pagpatuman sang mga programa sang gobyerno para mabuligan ang nagakinahanglan kag lider nga wala sang kahadlik sa pagpalayag kun ano ang ginapatihan.
Aminado man ang opisyal nga sadto pa man nabatyagan na nila sa DSWD ang kabudlayan nga maconfirm ang appointment ni Taguiwalo, apang nagalaum nga bisan paano ma-confirm ini kahapon.
Samtang gin-athag ni Hervilla ang pila ka mga akusasyon nga ginasiling rason sa pag-reject sang confirmation ni Taguiwalo kasubong sang pagkontra sini sa tax reform package nga inisyatibo sang Department of Finance, pork barrel sang mga kongresista kag pagkilala sa iya nga kalakip sa leftist group.
Suno kay Usec Hervilla, kun matood nga sinsero nga magserbisyo ang isa ka opisyal sang gobyerno daku nga paghangkat sa ila nga himoon sang ensakto ang ila trabaho kag wala nahadluk nga magpanindugan sa pihak nga madamo nga intereses ang ila matapakan.
