Nagapreparar na ang Taiwan sa ginalauman nga pagpanglaslas sang bagyong Kong-Rey ukon may Philippine local name nga bagyong Leon.
Mahibaluan nga sumugod kahapon, ginsuguran na sang mga lokal nga gobyerno sa Taiwan nga kanselahon ang klase sa mga eskwelahan kag trabaho agud makapreparar ang kada pamilya.
Kalakip sa mga ginapreparahan sang nasambit nga estado ang pagbaskog sang hangin nga posible maglab-ot sa 226 kph.
Magluwas diri, ginapreparahan man sang Taiwan Central Weather Administration (CWA) ang mga residente batuk sa torrential rains nga mahimo magdugay sang malawig nga tyempo.
Ini ang ginakalakipan sang Yilan County, Hualien County, Keelung, Taipei, New Taipei, Taitung County, Taoyuan kag Pingtung County.
Ginpaandaman naman sang gobyerno sa Taiwan ang mga residente nga magpatigayon sang temprano nga pag-evacuate sa tion nga kinahanglanon, kadungan sang pagbukas sa mga local evacuation center sang nasambit nga estado.
Samtang, base sa report sang Central Weather Administration, posible nga maka-eksperyensya sang dalayon nga pag-ulan ang dako nga bahin sang Taiwan sumugod subong tubtob buwas nga adlaw Nobyembre 1, bangud sa nasambit nga bagyo.
