ROXAS CITY – Malipayon ang mga ginikanan sang Grade-3 pupil nga si Cedric John Develos, bangud namana man sang bata ang ila talento sa pagpinta.
Sa interview sang Bombo Radyo sanday Lloyd Develos kag Nanileth Talahuron, ginikanan ni Cedric, ginpahayag sang mga ini nga wala nila ginpilit nga makahibalo sa pagpinta ang ila bata, sa baylo, nanotisyahan nalang sang mga ini nga huyog man ni Cedric ang pagpinta.
Bisan sa ila man nga mag-partner, ulihi na nila nahibaluan nga lunsay huyog nila ang pagpinta.
Sa pagkamatuod, wala sang nagsugo sa bata sang iya ginpinta nga laragway sang mag-abyan nga ido kag kuring sa ginhiwat nga National Philippines-Japan Friendship Art Contest pinaagi sa Patron of the Arts from Japan, Mr. Kenji Mori kag DepEd, sang tinalikdan nga bulan sang Hunyo, kun sa diin nangin kampeon si Cedric.
Suno pa sa amay sang bata, nga nagapasalamat man ini sa Makaako nga apisar may yara ini sang kasablagan sa lawas bangud sa Polio, namana naman sang iya bata ang iya talento sa pagpinta.
Mensahe ni Develos sa mga luyag mangin pintor, nga indi magkataka, magpraktis nga magpraktis kag padayon lang sa pagpinta, tubtob nga maabot ang handom.
