ROXAS CITY – Nagpaathag ang alkalde sang banwa sang Tapaz may kahilabtanan sa ila ginapatuman nga pagsulundan natuhoy sa household quarantine pass nga ginahatag sa pumuluyo kadungan sang pagpaidalom sa lockdown sa amo nga banwa bangud sang coronavirus disease (COVID-19).
Suno kay Tapaz Mayor Roberto ‘Nonong’ Palomar, nagmandu siya sa mga punong barangay sa kabaranggayan nga 3 porsyento lamang sa populasyon sang kada barangay ang mahimo makaguwa sa sulod sang isa ka adlaw kag makagamit sang quarantine pass.
Isa ini ka pamaagi suno sa alkalde agud malikawan ang pagdugok sang mga tawo sa merkado-publiko kag hugot nga mapatuman ang social distancing policy sang Department of Health (DOH).
Suno pa diri nga indi mahimo nga hatagan sang quarantine pass ang tanan nga pamalay sa banwa bangud nagalab-ot sa mas o menus 12, 500 ang households sa Tapaz.
Kun pahanugutan lamang ang kada household nga may makaguwa nga isa ka indibidwal, napat-od ni Palomar nga magadugok gid ang tawo sa mga merkado.
Apang suno diri kun tuman gid nga kinahanglanon sang isa ka persona ang quarantine pass bangud may importante ini nga pagabaklon, kinahanglan niya lamang magpalapit sa ila punong barangay bangud ila man ini nga ginakonsiderar.
Nahangpan man ni Palomar ang kaundan sang Memorandum Order No. 43 sang Executive Order No. 12, series of 2020 nga ginpapanaog ni Governor Esteban Evan ‘Nonoy’ Contreras apang suno diri ang iya ginapatuman ang aplikable lamang sa sitwasyon sa banwa sang Tapaz.
Nalipay man ini sa hugot nga kooperasyon sang mga Tapaznon sa mga otoridad kag sa mga pagsulundan nga ginapatuman sang lokal nga gobyerno sang banwa.
