ROXAS CITY – Padayon ang pagpatigayon sang imbestigasyon sang katapo sang Tapaz Municipal Police Station, angut sa nasapwan patay nga isa ka senior citizen kahapon sang aga sa kilid sang Malinao River sa Sitio Gutusan, Barangay Candelaria sa amu nga banwa.
Matandaan nga ginkilala ang biktima kay Severino Farillon Gardose, 67-anyos, mangunguma, residente sang Sitio Pasay-an, sang nasambit nga barangay.
Mahibaluan nga nasapwan na lamang sang isa ka menor de edad ang biktima nga wala na ini sang kabuhi kag yara sa ilid sang suba nga nagahigda ingod ang hinuptanan sini nga karabaw.
Antes pa man ang insidente, ulihi nga nakit-an ang biktima nga nagasakay sa karabaw nagikan sa Brgy. Apero padulong kun tani sa Brgy. Candelaria.
Bangud sini, ginapatihan posible nga samtang magasakay ini sa karabaw nahulog ang biktima kag nag-igo ang iya ulo sa matig-a nga bagay rason sang iya kamatayon.
