Tapaz PNP padayon ang imbestigasyon agud matumod ang suspek nga nagpatay sa isa ka persona nga may deperensya sa paminsaron

ROXAS CITY – Padayon ang imbestigasyon sang Tapaz Municipal Police Station sa pagkamatay ni “alyas Ben buang” sa Barangay San Jose, Tapaz, Capiz.

Suno sa Tapaz PNP may yara na sila sang person’s of interest nga responsable sa pagkamatay sang biktima.

Matandaan nga nasapwan na lamang sang tag-iya sang tiyangge nga si Josie Florendo, ang biktima nga nagahamyangon sa karsada.

Sa pagpati nga hubog lamang kag nagakatulog ang lalaki nga yara sa atubang sang tiyangge, ginpalapitan niya ini para pukawon.

Apang nakita sini ang dugo kag madamo nga pilas sa dughan kag iban nga parte sang lawas nga tuga sang pagpangbuno.

Gilayon naman nga gin-imporma sang ginang ang mga opisyales sang barangay nga amo ang nagpakig-angut sa mga katapo sang Tapaz PNP.