PANAY, CAPIZ- Personal nga nagpadulong sa banwa sang Panay si Capiz Governor Fredenil ‘Oto’ Castro agud nga magpanagtag sang food packs sa mga pumuluyo nga naapektuhan sang malain nga tyempo nga dala sang Bagyo Ramil sa probinsya sang Oktubre 18, 2025.
Sa interview sang Bombo Radyo kay Governor Castro, iya ginpahayag nga ang nasambit nga mga food packs, ang ginpanagtag sang patas kag wala sang marka pinulitika.
Suno kay Governor Castro, kinahanglan nga tululupod kag tupong ang mga maka-avail sang amo nga food packs bangud lunsay lang man nga naapektuhan sang amo nga bagyo.
Pahayag nya, kun ano ang nabatyagn sang isa, subong man ang sa isa, rason nga dapat wala sang piniliay sa pagpanghatag sang amo nga bulig.
Nahibaluan nga ang nasambit nga food packs nga gindul-ong sa banwa ang ginabulubanta yara sa mas ukon menos 3,500 boxes.
Nagpasalig naman ang gobernador sa mga pumuluyo sang patas nga pagtratar kag tululupong nga paghatag sang bulig kag pag-ulikid sa tagsa-tagsa ilabi na sa mga nagakinahanglan sang bulig.
Interviewed by Bombo Francis Biñas
