ROXAS CITY – Isa ka special investigation task group ang gintukod para imbestigahan ang pagluthang-patay kay Barangay Kapitan Elvis Asis sang Barangay Lawaan matapos ambangan sa Kilometer 2, Barangay Lawaan, Roxas City nga ginkapilas sang driver sang motorsiklo nga si Joselito Casilo.
Ginkumpirma sa Bombo Radyo Roxas ni Superintendent Dante Tayco, hepe sang Roxas City PNP nga siya ang ginpahamtang ni Senior Superintendent Samuel Nacion, provincial director sang CPPO para pamunuan ang nasambit nga task group sa diin makaupod sini ang mga imbestigador sang nasambit nga istasyon sang pulisya.
Una nga tikang sang task group ang magpangita sang posible nakasaksi sa krimen kag pagpangayo sang kooperasyon sang mga establisemento nga may CCTV camera nga malapit sa ginluntaran sang krimen sa diin makabulig ini sa ila nga imbestigasyon.
Nagpanindugan si Tayco nga planado ang krimen bangud malapitan ang pagluthang sa biktima, kag ginsiguro nga indi na ini mabuhi.
Nahibaluan nga nag-angkon sang patal nga pilas si Kapitan Asis sa diin ang bala tangkugo sini ang naglapus sa iya nga nawong kag may pilas pa ini sa likod kag abaga.
Narekober sang mga pulis sa ginluntaran sang krimen ang apat ka empty shells sang .45 caliber nga armas nga ginapatihan gingamit sang mga suspek sa pagluthang biktima.
Samtang, ipaidalum na sa autopsy ang bangkay sang opisyal matapos naghatag na sang pahanugot ang pamilya sini.
