Tatlo ka bihag sang Hamas, ginhilway na kag yara na sa karon sa Israel

Ginsuguran na sang Hamas ang paghilway sang ila nga mga bihag matapos nga nangin epektibo na ang ceasefire sa tunga nila sang Israel.

Ang mga tatlo ka Israeli hostages nga una na nga parte sa 33 ka bihag nga ihilway sa sulod sang anom ka semana ang ginkilala nga sanday Romi Gonen, Doron Steinbrecher kag Emily Damari.

Ginpasakamot sang mga Hamas ang mga bihag sa mga tinawo sang Red Cross kag ini ang gindala na sa Israeli military sa Gaza.

Ginalauman man sa mga masunod nga oras, pagahilwayon sang Israel ang mga bihag nila nga Palestino.

Suno sa Red Cross nga yara sa maayo nga kondisyon ang mga bihag.

Nagsaulog naman ang madamo nga Israelis sa Tel Aviv matapos ang paghilway sang una nga batch nga bihag sang mga Hamas.