TICO, Panay, Capiz – Arestado ang tatlo ka indibidwal sa buy-bust operation may kaangtanan sa paglapas sang Republic Act 10591 ukon ang Comprehensive Firearms and Ammunition Regulation Act sa Barangay Tico, Panay, Capiz.
Matandaan nga natabo ang entrapment operation September 6 sa takna sang 2:55 sang hapon, samtang kahapon nga adlaw September 8 ang tatlo ka arested person gin paidalom na sa inquest proceedings.
Ang mga suspetsado amo sanday alias Mund, 56-anyos, Jose, 52-anyos, nga lunsay residente sang Barangay Agbanog, Pontevedra, Capiz kag alias Rick, 56-anyos, residente naman sang Barangay Pundol, President Roxas, Capiz.
Sa interview sang Bombo Radyo kay Police Captain Eric B Deocampo, Officer-in-Charge sang Panay Municipal Police Station, iya ginpahayag nga kahapon nga adlaw napasaka na ang kaso ini kasunod sang tikang nga ginapahayag antes paman matapos ang reglementary period.
Suno kay Deocampo isa sa mga suspetsado may yara sang naga-exist nga kaso kag warrant of arrest, ini man ang ginaberipika sang Panay PNP kun ano nga dugang nga detalye kaangot sa iya nga kaso nga paga-atubangon.
Pahayag pa niya, bilang ibidensya nakuha ang isa ka isa ka unit sang 38 revolver, samtang ginkumpirma nga iligal nga droga ang nakuha sa ila ang apat ka gramos kag may yara sang standard drug price nga P40,800.
Sa karon nahibaluan nga ang tatlo ka indibidwal yara sa kustodiya sang Panay MPS para sa nagakaigo nga disposisyon kag sa dugang nga paglapas sa Republic Act 9165 ukon ang Comprehensive Dangerous Drugs Act of 2002.
