Tatlo ka lalaki ang nadakpan sang mga katapo sang Panay Municipal Police Station (MPS) kag MENRO LGU-Panay bangud sang iligal nga pagpangisda sa kadagatan sa banwa sang Panay
Ang mga nadakpan amo si akyas Jude, 40 anyos, kapitan sang sakayan upod ang duha ka tripulante nga sanday alyas Efren, 37 anyos kag alyas Joshua, 23- anyos nga residente sang Barangay Barra, Roxas City.
Sandig sa imbestigasyon sang Panay MPS, ginpatigayon ang joint operation matapos madakpan ang grupo nga nagapatigayon sang iligal nga pagpangisda nga ginatawag “Timing” nga wala sang Mayor’s Permit, nga paglapas sa Municipal Ordinance No. 03-02 ukon Municipal Fishery Code, Series of 2003.
Nakumpiska ang isa ka pump boat, duha ka diesel engine, 300 ka bilog sang timing nga may kompleto nga accessories, kag kapin sa kinse ka kilo sang nagkalain-lain nga kasag nga may kabug-usan nga balor nga Php148,000.00.
Sa subong, ang mga nadakpan kag ang mga nakumpiska nga kagamitan gin-turn over sa MENRO LGU-Panay para sa husto nga disposisyon kag padayon nga proseso sang kaso.
