Pagapasakaan sang kaso ang tatlo ka mga persona nga ginakabig Street Level Individual ukon “SLI”, nga nadakpan sa ginkasa nga drug buy-bust operation sa Brgy. Cabugao, Roxas City, Capiz.
Matandan nga ang nagkaladakpan amo sanday alyas Mar, 36-anyos, alyas Ian, 46-anyos, nga lunsay residente sang nasambit nga lugar kag si alyas Ria, 20-anyos residente sang Barangay Calitan, Panay Capiz.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office, iya ginpahayag nga nagresulta ang pagdakop sa mga subject person pinaagi sa joint operations sang Capiz Police Provincial Drug Enforcement Unit ukon “PDEU”, kag Roxas Component City Police Station.
Narekober naman sa operasyon ang isa ka heat-sealed transparent plastic sachet sang ginapatihan shabu nga ginakabig buy-bust item kag tatlo pa ka sachet sang suspected shabu nga nakuha sa possession sang mga arestado.
Nakumpiska man sang kapulisan ang P6,500 nga buy-bust money nga nagalakip sang P6, 400 nga boodle money kag isa ka P100 nga genuine bill.
Naglab-ot naman sa 17 grams ang kabug-usan nga kabug-aton sang nakumpiska nga ginapatihan shabu nga may ginabanta nga street drug price nga P115,600.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang paga-atubangon san mga arestado.
