Tatlo ka mga operasyon may kaangtanan sa drowning incident ang narecord sang Philippine Coast Guard (PCG)-Capiz sa bulan sang Abril.
Sa interview sang Bombo Radyo kay Senior Chief Petty Officer Arnel Nisola, Chief Master at Arms sang nasambit nga talatapan, iya ginpahayag nga sa subong nga summer season, ginamonitor man sang ahensya ang mga baybayon kag ang mga beachgoers agud malikawan ang bisan ano nga insidente.
Suno kay Nisola, lakip man sa ila ginkatutukan amo ang padayon nga inspeksyon sa mga pantalan sa syudad sang Roxas, partikular sa Barangay Banica kag Barangay Culasi, agud masiguro ang kaluwasan sang publiko.
Ginpahayag man sini nga ginapatuman man sang ahensya ang information drive may kaangtanan sa safety kag paglikaw sa disgrasya sa dagat.
Nagapangabay man ang PCG sang kooperasyon sang publiko agud mapabilin ang seguridad sang tanan.
