ROXAS CITY – Dead on arrival na sang ginpadangat sa ospital ang isa sa tatlo ka mga biktima nga ginapahayag nakuryente sa Barangay Maantol, Jamindan, Capiz.
Ginkilala ang mga biktima nga sanday Gene Isidoro 41-anyos, Russel Bipiniso 41-anyos kag bata sini nga isa ka menor de edad lunsay mga residente sang nasambit nga Barangay.
Sandig sa impormasyon nagikan sa Jamindan Municipal Police Station, natabo ang insidente takna alas 8 sang aga kahapon kun sa diin ginapahayag gin-utod ni Isidoro ang kuryente nga ginapanag-iyahan ni Bipiniso kag sa pagdumdum sini wala nagakonektar sa poste sang kuryente ang amu nga wire apang aksidente nga nakasangit ini sa live wire rason sang iya pagkakuryente.
Bangud sini, gintinguhaan pa ni Isidoro nga buligan kun tani ini pinaagi sa pagbutong sang iya buhok apang bangud sa mabaskog nga current sang kuryente nagtabog ini subong man ang menor de edad nga bata ni Bipiniso.
Gilayon naman nga ginpadangat sa Jamindan Rural Health Unit, ang mag-amay nga Bipiniso agud dapatan sang pauna nga pagbulong antes gindala sa ospital.
Samtang sa Mambusao District Hospital naman si Isidoro agud kun tani dapatan sang nagakaigo nga pagbulong apang, gindeklarar ini nga dead on arrival sang doctor.
Sa karun, padayon pa nagapaayo ang mag-amay sa nasambit nga ospital.
