Pilason ang tatlo ka mga persona matapos nga bumunggo sa poste ang ginasakyan nga motorsiklo sa Barangay Casanayan, Pilar, Capiz.
Ginkilala ang mga biktima nga sanday alyas “Glen”, 21-anyos, driver, kag utod sini nga si alyas “Carlen”, 17-anyos, kag bayaw sini nga si alyas “Jerry”, 29-anyos, lunsay mga residente sang Barangay Santa Fe sa nasambit nga banwa.
Suno kay Patrolman Oleimar Bereber sang Pilar Municipal Police Station, ginpahayag nga nagikan sa isa ka family gathering ang mga biktima sang natabo nga insidente.
Pahayag pa nga papauli na kuntani ang mga ini sa ila puluy-an sang hinali nga nadulaan sang kontrol sa pagmaneho ang driver kag bumunggo sa isa ka poste sang nasambit nga lugar.
Bangud sa impact sang pagkabunggo, nag-angkon sang pilas sa magkatuhay nga parte sang lawas si alyas “Jerry” samtang ginapahayag nga bali naman ang paa ni alyas “Glen”, kag bali naman ang abaga ni alyas “Carlen” nga gilayon naman nga ginpadangat sa ospital sa syudad sang Roxas ang mga biktima.
Mahibaluan nga yara sa impluwensya sang makahulubog nga ilimnon ang driver sang amo nga motorsiklo, amo man nga angkas sini.
Sa karon, yara na sa istable nga kondisyon si alyas “Jerry” nga na-discharge na sa ospital, samtang padayon nga ginabulong sa ospital ang duha ka mag-utod.
