PILAR CAPIZ – Natigayon nga masulod sang wala makilan-an nga mga kawatan ang tatlo tanan ka magkadikit nga tindahan sa Barangay San Nicolas, (Purok 3), Pilar Capiz.
Mahibaluan nga pinaagi sa facebook post, ginpakigbahin sang isa ka concerned citizen ang kuha sang Closed-circuit television (CCTV) footage sang tatlo ka tindahan kung sa diin wala sang kahadlok kag pagduha-duha nga ginsulod sang mga kawatan.
Sa interview sang Bombo Radyo kay Dan Diestro, isa sa mga nabiktima ginpahayag sini nga wala nila ginadahum-dahum ang amu nga insidente bangud sadto nga tion nagikan sila sa piyestahan kag maga-aga na sang makapauli.
Suno kay Diestro, nahibaluan na lamang nila ini pagka-aga matapos nagpakigbahin sa ila ang duha pa ka mga tag-iya sang tindahan.
Nataban sang mga kawatan ang benta nga mga kwarta, kag nagkalain-lain nga mga groceries.
Bangud diri, gilayon nila nga gintsekyar ang kuha sang cctv footage kag diri nakit-an ang mga suspek nga ginapahayag pumuluyo sang banwa sang Pontevedra.
Dugang pa ni Diestro nga base sa ila pagpangusisa sa background sang mga suspek anay na ang mga ini nga nagapangawat sa nagkalain-lain nga banwa.
Ginsiling pa sini nga indi lamang ini ang una nga tion nga gintestingan nga sudlon ang tatlo ka mga tindahan bangud ini na ang ika-tatlo ka beses nga pagtesting sang kawatan kag natigayon.
Sa karun, padayon ang ila pagpakig-angut sa katapo sang Pilar Municipal Police Station agud matigayon nga madakpan kag mapanabat ang amu nga mga suspetasado sa pagpangawat.
