ROXAS CITY-Nagpositibo sa ginhiwat nga test sang mga katapo sang Bureau of Fisheries and Aquatic Resources (BFAR) ang tatlo ka mg nagkaladakpan bangud sa illegal nga pagpangisda.

Matandaan nga duha ka banyera sang nagkalainlain nga sahi sang isda, isa ka longneck nga botelya nga naga-unod sang kemikal nga ginagamit sa improvised nga dinamita ang narekober sang mga katapo sang kapulisan sa tatlo ka mga tripulante nga nadakpan sa akto nga nagapatigayon sang dynamite fishing sa kalalawran nga sakop sang Barangay Banica, Roxas City.

Sa interview sang Bombo Radyo kay PMAJ. Wilmar Bolivar, hepe sang Capiz Maritime Police Station, nabaton na nila ang certificate nagikan sa Bureau of Fisheries and Aquatic Resources (BFAR)  sa ginhiwat sini nga test sa mga narekober sang isda.

Base sa nangin resulta sang amo nga test, nahibaluan nga positibo ini nga naggamit sang dinamita.

Sa nakaligad nga mga inadlaw ginhilway na sa karsel ang mga nasambit nga mga suspetsado matapos nagtakop ang ila nga reglementary period of detention.

Sa karon, may pila pa ka mga dokumento nga ginahulat nagikan sa Forensic Unit ang mga katapo sang Capiz Maritime Police Station para pormal na nga mapasakaan sang kaso ang tatlo ka mga suspetsado sa paglapas sa RA 10654 Section 92 ukon Fishing Through Explosives, Noxious or Poisonous Substance, or Electricity kag Section 126 ukon Posessing, Dealing in or Disposing Illegally Caught or Taken Fish.