ROXAS CITY – Masuwerte nga wala sang may naigo sa nagluntad nga pagpaarak sang luthang sa ugsaran sang isa ka puloy-an sa Sitio Bakwit, Barangay Dulangan, Pilar, Capiz.
Ginkilala ang tag-balay kay Brix Bocala, 26-anyos, may pamilya kag residente sang nasambit nga lugar.
Sandig sa iya ginpabalhag kag inisyal nga imbestigasyon sang mga katapo sang Pilar MPS, nga alas-9:00 kagab-i sang Huwebes, sang may nabatian ini nga haboy sang bato’ sa guwa sang ila balay, kag sa iya pagtsekyar nakita sini ang tatlo ka mga persona sa madulom nga porsyon sang ila kudal.
Nagsinggit pa suno diri ang isa sa tatlo ka mga persona kag hinali nga naggabot sang isa ka armas-luthang nga gilayon ginpalupok.
Madasig nga nagbalik sa sulod sang ila balay si Bocala kag nagpanago sa hilway nga lugar.
Ginpahayag nga nagpaarak sang luthang ang mga persona tubtob sa unhan sang ila balay.
Narekober sang mga kapulisan sa guwa sang ila balay ang walo (8) ka mga baseyo sang bala, samtang siyam (9) naman ang nakit-an sa basketball court, 30 metros ang kalayuon sa amu nga puloy-an, nga lunsay iya sang .45 calibre nga armas-luthang.
Sa karon, padayon ang imbestigasyon sang mga kapulisan sa motibo sang mga suspek sa insidente.
