Liwat nga nagbayluhanay sang pag-atake ang Estados Unidos sang Amerika kag Iran kasunod sang pila ka bulan nga kalmado, lakip na ang pag-atake sang US sa tatlo ka Iranian oil tankers.
Ginkumpirmar sang US military nga duha ka oil tanker nga may kaangtanan sa Iran ang “permanently disabled” samtang ang ikatlo nga tanker ginreport nga gin-atake sa Gulf of Oman.
Samtang, ginpahayag naman sang Islamic Revolutionary Guard Corps sang Iran nga gin-atake sini ang tatlo ka mga sakayan pandagat nga kaalyado sang US bangud sa gina-alegar nga pag-agi sa indi otorisado nga ruta sa Strait of Hormuz.
Nahibaluan nga ang Strait of Hormuz, isa ka importante nga international oil trades bangud isa ini sa mga nagapanguna nga ruta sang petrolyo, apang ang pag-agi sa sini nangin limitado bangud sang nagadugang nga tensyon sa tunga sang US kag Iran.
