ROXAS CITY – Tatlo ang nabalhag nga nagkalapilasan sa nagluntad nga sunog kaina pasado alas 8:00 sang aga sa Bayot Drive, Barangay IX, Roxas City.
Sa interview sang Bombo Radyo kay SFO2 Reynold Agda, Chief Intelligence and Investigation Section sang Roxas City Fire Station, ginpahayag sini nga tatlo ka persona ang nag-angkon sang minor injuries bangud sa pagbulig nga matapna ang kalayo kag ang iban nagtinguha nga masalbar ang ila kagamitan.
Matandaan nga totally burned ang isa ka unit sang 2-storey nga balay samtang partially burned naman ang duha pa ka balay. Ginkilala ang mga nagapanag-iya sang tatlo ka balay nga sanday Francisco Fuentes Sr, Francisco Fuentes Jr kag Franklin Fuentes nga lunsay mga residente sang nasambit nga lugar.
Suno kay SFO2 Agda, nagsugod sa balay ni Francisco Fuentes Jr ang sunog.
Apisar nabudlayan suno diri ang mga bombero sa pagpalong sang kalayo bangud gutok kag dikit-dikit ang mga kabalayan sa lugar, maswerte nga wala na ini naglapta pa kag napalong gilayon ang sunog pinaagi sa pagbinuligay sang mga pumuluyo kag katapo sang bombero.
Naglab-ot naman sa P22,000 ang nangin kahalitan sang nasambit nga sunog.
Sa karon, nagapadayon ang imbestigasyon sang katapo sang bombero kun ano ang gintunaan sang amu nga sunog.
