ROXAS CITY – Hatagan prayoridad sang Roxas City Council ang mga manugbaligya sa sulod sang Teodoro Arcenas Trade Center (TATC) pinaagi sa pag-review sang tanan nga ginabaydan sang mga vendors.
Sa interview sang Bombo Radyo kay Councilor Fernando Luis Viterbo, Chairman sang Committee on Economic Enterprises, iya ginpahayag nga madamo sang kaayuhon sa nasambit nga merkado lakip na ang pag-tsekyar sang landing fee, entrance fee kag balaydan sa arkabala.
Ini bangud suno sa iya, natukiban nga may yara sang ginaalegar unauthorized nga suktanay sa mga manugbaligya sa diin wala sila ginasukot sang insakto ukon ginapasobrahan man kun kaisa ang ginasukot nga balaydan para sa merkado.
Pahayag niya, unfair ini para sa mga vendors sang Teodoro Arcenas Trade Center bangud kun dako ang ila ginabaydan nga landing kag entrance fee, amo man ang arkabala, maapektuhan man ang ila baligya sa diin magapamahal man sila sang ila mga produkto.
Nagpasalig ang konsehal nga sarang mapanubo ang presyo sang balaklon sa merkado pinaagi sa pagpasar sang ordinansa nga mahatagan sang tax breaks ang mga vendor sa sulod sang TATC.
