ROXAS CITY –Dismayado ang isa ka tricycle driver sa nangin aktwasyon sang team leader sang Roxas Environmental Sanitation Enforcement Team (RESET) nga nagdaku daku agud ma-isyuhan ini sang citation ticket sang isa ka traffic auxiliary, sa pihak nga wala ini sang nakomiter nga bayolasyon.
Partikular nga gintumod ni Manong Bert si RESET team leader retired police col. Primo Golingay nga nagsita sa iya matapos nakita ang pagpondo sang tricycle sini sa isa ka lugar sa TATC kag ang pagsakay sang iya asawa nga sa pagpati sang anay police officer isa ka pasahero.
Ba-se sa panaysayon ni Manong Bert nga nagpadulong sila nga mag-asawa sa TATC para magpanindahan.
Samtang nagahulat ang tagreklamo sa iya misis nagpangita ini sang maparkingan nga lugar.
Matapos makapanindahan sang asawa ni Manong Bert nagdiretso ini sa lugar sa diin naka-parked ang tricycle sang bana, apang ila ginkakibot sang nagpalapit si Golingay kag ginkuha ang iya lisensiya bangud suno diri colorum ang ila tricycle.
Gintawag pa ni Golingay ang traffic auxiliary nga si alyas Bungot kag ginmanduan nga isyuhan sang citation ticket si Manong Bert bangud sa nakomiter nga bayolasyon.
Sa pihak sang ginpakita nga ID sang asawa ni Manong Bert nga nagapamatood nga asawa sang tagreklamo ang nagsakay sa tricycle kag wala ini nagapang-pick up sang pasahero, ginbalewala ini ni Golingay.
Nahibaluan nga nag-atubangay ang tagreklamo kag si traffic auxiliary Bungot sa talatapan sang TMU sa diin ginpamatud-an sang auxiliary nga wala sang nakomiter nga bayolasyon ang tagreklamo.
