Ginsuguran na sang Team USA ang pagpreparar para sa Paris Olympics subong nga adlaw Hulyo 7, 2024.
Mahibaluan nga ginsuguran sang world No. 1 team ang training camp sa Las Vegas kag sa masunod nga Huwebes, Hulyo 11, 2024 gilayon nga magapaidalum ini sa isa ka exhibition game kontra Team Canada.
Kaangay sadtong FIBA 2023, magaserbi sa gihapon nga head coach ang batikan nga Golden State Warriors coah nga si Steve Kerr.
Ang Team USA ang ginakabug-usan sang dalagkuan nga pangalan nagikan sa NBA nga ginakalakipan nanday Stephen Curry, Lebron James, Devin Booker, Anthony Davis, Kevin Durant, Anthony Edwards, Joel Embiid, Tyrese Haliburton, Jrue Holiday, Kawhi Leonard, kag Jayson Tatum.
Base sa mga nauna nga pahayag ni coach Kerr, posible nga maghampang si Lebron James bilang point forward kag pagapangunahan ang mga transition plays samtang ang 3-point king posible nga gamiton sa off ball offense.
Dugang pa sini nga nakasugilanon na niya sanday Curry kag Lebron nga duha sa pinakamaabilidad nga player sa NBA kag nahinalaan ang angut sa mangin grupo sang duha sa torneo.
Mahibaluan nga ang duha ka nasambit nga player, ginkilala bilang ‘generational player’ sang NBA anay na nga nag-atubangay sa sulod sang apat ka asud-asud nga Finals sadtong 2015, 2016, 2017, kag 2018.
Tatlo ka championship ang ginbulsa ni Curry samtang isa naman ang nadag-an ni Lebron.
Apang suno sa coach, lunsay masadya ang mga ini sa pagtingub sa isa ka team kaupod ang iban pa nga mga batikan nga NBA player nga kadam-an mga champion.
