Ginkumpirmar sang Department of Justice nga magasugod na ang ila plano nga technical diving operation sa Taal Lake.
Ini agud makit-an ang posible nga mga bangkay sang mga nadula nga manugbulang nga ginapahayag ginlubong sa bahin sang Taal Lake.
Suno kay Justice Secretary Jesus Crispin Remulla, ang implementasyon sang nasambit nga diving sa Taal Lake ang magasugod bisan ano nga adlaw subong nga semana.
Ini ang pagapangunahan sang mga ahensya sang gobyerno sa bulig sang Philippine Navy kag Philippine Coast Guard, nga amo ang una nga nagpahibalo sang ila kahandaan sa operasyon.
Apang ginklaro sini nga wala ini sang kaangtanan sa ila pagpangayo sang bulig sa gobyerno sang Japan para sa dugang nga kagamitan.
Gin-athag sang tiglikom nga sang nagligad lang nga semana ginpadala ang sulat, gani subong lang nila ginalauman nga mabaton ang sabat nga ipadala.
Gindugang pa ni Justice Secretary Jesus Crispin Remulla nga indi man madula ang posibilidad nga posible may iban pa nga lokasyon kun sa diin ginlubong ang mga nadula nga mga manugbulang.
Apang sa pihak sini, ginhatagan sini sang importansya nga mabakod kag solido ang ila impormasyon kun sa diin dapat ipatigayon ang technical diving operation.
Madumduman nga ang nasambit nga rebelasyon angut sa nadula nga mga biktima sang sabungero ang una nga ginbuyagyag sang testigo nga si alyas ‘Totoy’ nga ang pangalan amo si Julie ‘Dondon’ Patidongan.
Ginbuyagyag man sini nga ginlubong ang mga biktima sang sabungero sa isa ka bahin sang Taal Lake matapos ginpatay.
Gani, luyag hibaluon sang Department of Justice kun may mga bangkay nga makit-an sa lokasyon sang nasambit nga Taal Lake.
