Nangin sentro sang diskusyon ang seguridad kag privacy ni Sen. Ronald dela Rosa matapos sang mosyon nga tugutan ang teleconferencing sa Senado agud makatambong ang mga senador sa plenary sessions pinaagi sa online platform.
Sa interview sang Bombo Radyo Roxas kay Atty. Joenar Pueblo,President sang Philippine Arbitration Center in Visayas, iya ginpahayag nga apisar may legal nga basehan ang mosyon ni Sen. Marcoleta kag ginakabig ini nga makabag-o nga tikang, posible man ini suno sa iya nga magtuga sang risgo labi na sa bahin sang digital security.
Suno kay Pueblo, posible nga ma-monitor ang lokasyon sang isa ka senador samtang nagagamit sang video conferencing platforms, bagay nga mahimo makaapekto kay dela Rosa nga padayon nga gina-angot sa isyu sang warrant halin sa International Criminal Court ukon ICC.
Pahayag pa niya, mahimo makabulig ang teleconferencing sa pagpadayon sang importante nga mga trial sa Senado, lakip na ang nagahilapit nga impeachment trial ni Vice President Sara Duterte, apang ginpabug-atan niya nga kinahanglan nga timbangon sing maayo ang benepisyo kag posible nga mga peligro sini.
Nagalaum man ang natungdan nga indi na maglawig pa ang debate may kaangtanan sa amo nga isyu agud makapokus ang Senado sa mas importante nga mga concern sang pungsod.
