Ginbasura sang San Juan Regional Trial Court (RTC) Branch 160 ang request ni Senador Jinggoy Estrada para sa temporary restraining order (TRO) batuk kay anay DPWH Bulacan first district assistant engineer nga si Brice Hernadez.
Una na nga nagpasaka sang civil case ang Senador para sa damages kaupod ang request para sa temporary restraining order kag injunction batok kay Hernandez agud indi na makahimo sang alegasyon batok sa Senador.
Matandaan nga ang kaso ang may kahilabtanan sa akusasyon ni Hernandez batuk sa Senador nga gin-alegar nakabaton sang kickbacks halin sa maanomaliya nga flood control projects.
Apang, ang RTC Presiding Judge Aicitel Lascano-Nethercott nagsiling sa resolusyon nga ang korte wala sang awtoridad sa pagdumili sa legislative committee sa pagmando sang isa ka indibidwal nga mag-atubang kag magtestigo sa mga pagpangusisa.
Dugang pa, ginpaathag sang natungdan nga ang Temporary Restraining Order gina-isyu lamang kon ang bagay may “extreme urgency”.
Samtang, ginklaro naman sang bahin sang Senador nga Temporary Restraining Order lamang ang ginbasura sang korte apang nagapabilin nga pending ang aplikasyon para sa Writ of Preliminary Injunction kag natalana nga pamatian sa Nobyembre 12 kun sa diin hatagan sang kahigayunan ang magtimbang nga bahin nga makapresentar sang ila mga argumento kag ebidensya.
