Sa idalom sang Executive Order No. 21, Series of 2026, nga ginpasaka ni ๐๐ผ๐๐ฒ๐ฟ๐ป๐ผ๐ฟ ๐๐ฟ๐ฒ๐ฑ๐ฒ๐ป๐ถ๐น ๐. ๐๐ฎ๐๐๐ฟ๐ผ, ang Gobyerno Probinsyal sang Capiz igapatuman ang mas hugot nga kampanya batuk sa African Swine Fever (ASF) sa probinsya, kag nag-implementar sang temporary, unconditional total blanket ban sa pagpasulod sang tanan nga klase sang baboy kag mga produkto sini nga magahalin sa guwa sang probinsya.
Ang pagdumili nagalakip sa pagpasulod, pagkarga, pagdala, pagtransportar, pagdeliber, kag pagbaligya sang tanan nga klase sang karne sang baboy, bisan ano pa ang lebel sang pagproseso sini ukon ang katuyuan sa pagbaligya. Wala sing eksempsyon nga ihatag para sa personal nga konsumo ukon bilang pasalubong (gifts). Bisan pa may veterinary health certificate, shipping permit ukon iban pa nga mga dokumento, indi ini mangin basehan agud tugutan ang pagsulod sang mga pork products sa Capiz bangud sa posible nga kontaminasyon sa tion sang transportasyon.
Paagi sa sini nga tikang, ginatinguhaan sang Gobyerno Probinsyal nga maprotektahan ang industriya sang paghupot sang baboy, pagluwas sa ila sini populasyon sa probinsya, kag masiguro ang food security sang mga Capisnon batok sa epekto sang ASF.
