Gin-anunsyo sang Chinese Foreign Ministry nga ginadumilian si Defense Secretary Gilberto Teodoro Jr. kag ang iya pamilya nga makasulod sa mainland China, Hong Kong kag Macau.
Lakip man sa sanctions ang pagdumili sa mga indibidwal kag organisasyon sa China nga makigtransaksyon ukon magkooperar kay Teodoro kag sa iya pamilya.
Suno sa China, ginhimo ini nga tikang agud maprotektahan ang ila soberanya, seguridad kag national nga interest.
Ginpahayag sang Chinese Foreign Ministry nga bunga ini sang mga pahayag ni Teodoro nga ginakabig nila nga nagadulot sang tensyon sa relasyon sang Pilipinas kag China.
“To uphold China’s sovereignty, security and development interests, China has decided to prohibit Gilberto Teodoro Jr. and his spouse and child from entering the Chinese mainland, Hong Kong and Macao, and not allow organizations and individuals in China to engage in any transaction, cooperation or other activities with him and his spouse and child,” kabahin sang statement sang Chinese foreign ministry.
Nahibaluan nga lakip si Teodoro sa pinakamabaskog nga kritiko sang mga ginahimo sang China sa West Philippine Sea. Ginasabat man sini nga masangkad nga maritime claims sang Beijing.
