Ginkonsiderar sang grupo nga karapatan nga isa ka turning point sa Article I sang Articles of Impeachment batok kay Vice President Sara Duterte ang testimonya ni Atty. Michael Poa sa ika-21 nga adlaw sang impeachment trial.
Ini kasunod sang pag-atubang ni Poa bilang hostile witness sa Senate impeachment court, diin gin-usisa siya may kaangtanan sa P112.5 million nga confidential funds sang Department of Education (DepEd).
Sa interview sang Bombo Radyo kay ni Raoul Manuel, National Council member sang Karapatan, iya ginpahayag nga ang testimonya ni Poa naghatag sang dugang nga kabug-aton sa alegasyon sang Article I bangud gin-ako sini nga siya ang nagsabat sa Commission on Audit ukon COA sa audit findings, apang wala siya personal nga ihibalo kon paano aktuwal nga gin-gamit ukon gin-operate ang confidential funds sa field.
Suno kay Manuel, nagapakita ini sang seryoso nga isyu sa accountability kag responsibilidad sa paggamit sang confidential funds, bangud ang opisyal nga nagsabat sa COA wala man mismo sang firsthand knowledge sa mga operasyon nga ginpondohan sang pondo.
Pahayag pa niya, importante ang testimonya ni Poa bangud mahimo ini nga mangin basehan sang impeachment court sa pag-usisa kon may yara gid sang systematic misappropriation ukon irregular liquidation sang confidential funds sa DepEd sa panahon nga si Sara Duterte ang Education Secretary.
