Nag-ugyon ang Thailand kag Cambodia para sa gilayon nga ceasefire sa ila mga border.
Sa isa ka joint statement, nagpromisa ang duha ka pungsod nga untaton ang pila ka semana nga deadly border clashes nga nagpatay sang 101 ka tawo kag nagpahalin sang masobra tunga sa milyon ka mga indibidwal sa duha ka pungsod.
Ang ceasefire agreement ginpirmahan ni Thai Defence Minister Natthaphon Narkphanit kag sang iya Cambodian counterpart, Defence Minister Tea Seiha.
Base sa mga ministro sang depensa sang Thai kag Cambodia, ang duha ka bahin nag-ugyon nga ipabilin ang karon nga pagdeploy sang ila mga tropa nga wala na sang dugang nga paghulag lakip ang tanan nga sahi sang ila mga armas subong man ang pag-untat sang mga pag-atake sa mga sibilyan kag imprastraktura.
Kabahin sang kasugtanan amo ang pagtugot sa mga sibilyan nga nagapuyo sa mga boarder nga makapauli sa ila mga puluy-an sa labing madali nga panahon. Ang duha ka pungsod nag-ugyon man sa pagbinuligay sa demining efforts kag pagpakig-away sa cybercrime.
Ang amo nga kasugtanan ang ginpatuman kasunod sang hugot nga peace talks sa tunga sang duha ka kaingod nga pungsod matapos liwat nga nagdabdab ang tensyon sa ila mga border sa una nga bahin sang Disyembre subong nga tuig.
