ROXAS CITY – Kasunod sang pagpanalasa sang Super Typhoon Rolly sa bahin sang Bicol Region partikular na sa Albay province nagpatigayon sang monetary donation ang “Kbyanihan” sa idalom sang The Anluwagi Project organization para sa mga naapektuhan kag nahalitan sang amo nga bagyo.
Ini ang ginpahayag sang chairperson kag founder sang nasambit nga organisasyon nga si Flory Joy Alvarez sang mainterview sa Good Morning Philippines Program.
Suno kay Alvarez nga tinutuyo sini nga organisasyon nga makabulig sang mga Pilipino partikular na sa mga nahalitan kag naapektuhan sang pila ka mga bagyo nga nag-abot sa pungsod kalakip na diri ang Super Typhoon Rolly.
Ginpahayag sini nga pinaagi sa ila nga proyekto mabuligan nila ang mga nabiktima sang nasambit nga bagyo.
Ang nasambit nga organisasyon ang ginabug-usan sang mga nagkalain-lain nga national committee kun sa diin naghalin pa sa iban nga mga lugar sa Luzon, Visayas kag Mindanao subongman ang NCR.
Kabulig man nila ang pila ka mga Youth organization nga ginalakipan sang The Anluwagi Project, Bangon Pilipinas, Samahan ng Kabataang Boluntaryo ng Pilipinas kag TAYO organization sa pagpatigayon sang amo nga proyekto
Dugang pa sini nga bukas ang facebook page sang The Anluwagi Project sa pagbaton sang mga bulig sa mga donors.
Mahibaluan nga nagalab-ot na sa P19,258.64 ang kwarta nga gindonar sa amo nga organisasyon para makabulig sa mga tawo nga naapektuhan sang Super Typhoon nga nag-abot sang damlag lang sa pungsod.
