MANILA – Naghalad sang balaan nga misa ang simbahan sang Minor Basilica and Metropolitan Cathedral of the Immaculate Conception ukon mas kilala bilang The Manila Cathedral para sa hiwaton nga conclave subong nga adlaw.
Nagpatigayon sang una nga misa kaina pasado alas 7:00 sang aga, bilang pakig-isa sa mga kardinal nga natalana nga magpili sang panibag-o nga Santo Papa.
Ginpangunahan ni Fr. Vicente ‘Viel’ Gabriel Bautista, vice rector sang The Manila Cathedral ang selebrasyon sang balaan nga misa.
Ginpahayag sini sa iya homily, nga makasaysayan ang ini nga adlaw bangud magasulod liwat sa sulod sang Sistine Chapel sang Vatican ang masobra isa ka gatos nga kardinal agud ipangamuyo, pamalandungan kag mag-elect sang panibag-o nga lider sang simbahang Katolika.
Ginganyat man sang nasambit nga pari nga indi lamang maglantaw ukon itutok ang atensyon sa mga ‘personal qualifications’ nga ginapangita sa isa ka santo papa.
Gin-imbitaran man sini ang mga tumuluo nga makig-isa sa pangamuyo kag idangop sa Diyos nga bendisyonan sang grasya ang mapilian nga Santo Papa.
Ginhaylo man sini ang tanan nga indi lamang pag-isalig sa mangin masunod nga Santo Papa ang hilimuon sang simbahan kundi panawagan sini sa mga Katoliko nga makigbahin sa pagmisyon nga mapabutyag sa isigkatawo ang kasuguan kag paghigugma sang Diyos.
