LAGUNA, Philippines – Nangin una nga ospital sa rehiyon ang The Medical City South Luzon “TMCSL”, nga naglunsar sang MALDI-TOF Mass Spectrometry, isa ka moderno nga teknolohiya nga makahatag sang mas madali kag mas ensakto nga pagkilala sa mga bakterya kag fungi nga nagadala sang impeksyon.
Suno sa TMCSL, ang amo nga serbisyo magabulig sa mga doktor nga makahatag sang mas paspas kag mas target nga pagbulong sa mga pasyente nga may ginapatihan nga bacterial ukon fungal infection.
Antes sang pag-abot sang MALDI-TOF, makita lamang ang amo nga teknolohiya sa pila ka tertiary hospitals sa Metro Manila.
Sa tradisyunal nga pamaagi, mahimo mag-abot sang 24 tubtob 72 ka oras ukon mas dugay antes makilala ang microorganism nga nagadala sang impeksyon.
Apang pinaagi sa MALDI-TOF Mass Spectrometry, mahimo na nga mahibaluan ang resulta sa sulod lamang sang pila ka minutos pagkatapos makuha ang sample.
Ginpahayag man sang ospital nga may yara ini sang kapin 90 tubtob 95 porsyento nga accuracy sa pagkilala sang kadam-an nga klase sang bakterya kag fungi.
Mapuslanon ini labi na sa mga kaso sang sepsis, pneumonia, urinary tract infection ukon UTI, kag iban pa nga seryoso nga impeksyon nga nagakinahanglan sang madali nga medikal nga pagbulong.
Dugang pa sang TMCSL nga ang mas paspas nga diagnosis mahimo makabulig sa pagpaubo sang panahon sang pagpabilin sang pasyente sa ospital, pagnubo sang gastuhon sa pagpatambal, kag pagpaayo sang resulta sang ila pagpanginbulahan.
Sa karon, available na ang MALDI-TOF sa Department of Pathology and Laboratory Services sang TMCSL, samtang ang coverage sa HMO magadepende sa benepisyo sang tagsa ka plano kag sa pag-aprubar sang Letter of Authorization ukon LOA.
