Pormal na nga ginlunsyar sang Bombo Radyo Philippines ang ‘THE NEXT BOMBO IDOL’ nga isa ka Extemporaneous Speaking Contest nga magapukaw sa interes sang mga kabataan nga Capizeño nga mas pasangkaron ang ila abilidad sa pag-komentar kag critical thinking.
Sa interview sang Bombo Radyo kay Bombo Warren Lopez French, Assistant Vice President sang Bombo Radyo Philippines, iya ginpahayag nga ang ini nga proyekto ang naka-sentro sa pagpabaskog sang patisipasyon sang mga kabataan sa syudad sang Roxas kag probinsya sang Capiz pamaagi sa sini nga kompetisyon nga magagamit sang Hiligaynon bilang medium of instruction.
Suno kay Bombo Warren French, ang ini nga kompetisyon ang may tinutuyo man nga mas mapa-umwad ang kinaiya nga potensyal sa komunikasyon, analytical skills kag mahimo nga mangin parte man sang mga programa sang Bombo Radyo sa mga masunod nga tinuig.
Pahayag pa niya, ang ini nga aktibidad ang mas makabulig man sa pagpapag-on sang koneksyon sang Bombo Radyo sa kultura kag aktibidad ilabi na nga magaselebrar ang syudad sang Roxas sang Sinadya Festival.
Maga-intra sa nasambit nga kompetisyon ang mga estudyante gikan sa elementary, secondary kag college level sa bilog nga probinsya sang Capiz.
Pagapilion ang ‘The Next Bombo Idol’ pinaagi sa mga masunod nga criteria:
Content & Relevance – 40%
Delivery (Voice, Pronunciation, Diction, Confidence) – 30%
Organization of Ideas – 20%
Stage Presence – 10%
(BOMBO IDOL 2)
Nahibaluan nga ini man ang labing una nga beses nga igapatigayon ang ‘THE NEXT BOMBO IDOL’.
Pagahiwaton ini sa December 6, 2025, halin 1:00 PM tubtob 6:00 PM, sa SM City Roxas, Arnaldo Boulevard, Barangay Baybay, Roxas City.
