ROXAS CITY – Gintadlong sang tiayon sang 40 anyos nga mister nga wala naghikog ang iya nga bana nga nakit-an na lamang sini nga wala na sang kabuhi sa sulod sang ila nga balay sa Barangay Baybay, Roxas City.
Suno kay Jonefin Espinosa, tiayon sang napatay nga si Eliseo Espinosa Jr. alyas Toto nga nakit-an na lamang sini nga wala na nagahulag ang iya bana apang ginpanginwala sini nga nakabitay ang biktima sang iya nakit-an.
Ginpahayag sang ginang nga una siya nga natingala bangud wala nagaandar ang TV sa ikaduha nga panalgan sang ila nga balay nga nakaandan na nga himuon sang iya mister kun gab-i.
Bangud diri, nagsaka ini kag didto nakit-an ang mister nga wala na sang kabuhi nga nagapungko.
Bangud sang tuman nga kakibot, nagpanic ang ginang kag una nga gindumdom nga naghikog ang iya bana bangud may nakit-an ini nga pisi.
Apang ulihi na sang makamarasmas ini kag nahangpan nga ang pisi nga iya nakit-an ang pisi sang duyan nga ila ginagamit sa ila anak.
Gindala pa sa ospital ang biktima apang gindeklarar nga dead on arrival.
Nagaguha naman sa findings sang doctor nga cardiac arrest ang gintunaan sang kamatayon sang biktima.
Aminado man ang ginang nga may madugay na nga ginabatyag nga balatian sa korason ang biktima nga ginapahayag yara pa sa idalom sang impluwensiya sang makahulubog nga ilimnon sang gin-atake ini sa korason.
