ROXAS CITY – Halos indi man gihapon magsulod sa paminsaron sang pamilya sang isa ka frontliner ang natabo sa ila himata matapos nga ginbawian sang kabuhi sa nagluntad nga aksidente sa Barangay Ondoy, Ivisan, Capiz.
Sa exclusive interview sang Bombo Radyo Roxas kay Robelyn Yap, tiayon sang nagtaliwan nga driver sang ambulansiya sang Sigma Response Team nga si Darius Yap, antes pa man natabo ang insidente, nakadamgo pa ini nga kasubong bayaan ini sang iya bana rason nga gintawagan niya ini kag gin-istorya.
Suno kay Robelyn, halos isa pa lamang ka tuig nga driver sang ambulansiya sang Sigma Response Team ang iya bana matapos nakapangayo sila sang bulig sa ila kapitan kag nagapangita sang maga-volunteer nga driver.
Dugang pa sini wala nagkulang ang bana sini sa pagsuporta sa iya kag sa ila nga bata.
Luyag sa karon sang pamilya nga matutukan kag mapadalman sang mga kapulisan ang imbestigasyon agud maagum sang pamilya ang matuod-tuod nga hustisya sa pagkamatay sang ila nga himata.
