ROXAS CITY – Ginpanginwala sang tiayon sang isa ka suspetsado nga imbolbado ang bana sini sa kamatayon ni Retired Master Sergeant Joniffer Borda nga gintiro patay sa Barangay Bolo, Roxas City.
Ginpanindugan sang wala na ginhingadlan nga tiayon ni Rogelio Padernal nga wala ini nagapati nga imbolbado ang bana sa kamatayon ni Borda.
Ginpahayag sang ginang nga ginkakibot na lamang sini sang gindala na si Padernal sang mga kapulisan sa Roxas City Police Station.
Suno sa ginang nga nagabiyahe gid lamang sang tricycle ang bana sini kag nakapauli sa ila nga panimalay sang tion nga gintiro-patay si Borda.
Apang gin-ako sini nga kilala sang bana ang biktima bangud nagatrabaho ini bilang reliever security guard sang Gold Claw Security Agency.
Mahibaluan nga naga-duty ini regular nga guwardiya sa nasambit nga agency apang ginhimo lamang ini nga reliever.
Ginpanginwala man sini nga nagakinahanglan sila sang kwarta kag nagagamit sang iligal nga droga si Padernal.
Samtang wala man ini nagapati nga “master mind” ang bana sa pagpatay kay Borda bangud kilala sini ang bana nga mabuot kag maayo nga tawo.
