Tigulang, nasapwan-patay sa sulod sang iya balay sa Dao

ROXAS CITY – Patay na sang nasapwan ang isa ka tigulang sa sulod sang iya balay sa Barangay Daplas, Dao, Capiz.

Ginkilala ang biktima nga si Abadesa Bendoy, 73 anyos sang nasambit man nga lugar.

Base sa nakuha nga impormasyon sang Bombo Radyo, ginapahayag nga nagpanawag si Punong Barangay Erwin Campos sa Dao Municipal Police Station matapos nasapwan-patay ang biktima.

Nakit-an sang iya mga himata nga nagahigda sa iya katre ang biktima nga wala na sang kabuhi.

Ginapahayag nga naga-isahanon na lamang sa amo nga balay ang biktima bangud balo na ini.

Padayon naman nga ginapadalman sang mga kapulisan ang ila imbestigasyon kag ginpaidalom sa autopsy examination ang bangkay sang biktima agud mahibaluan kun may yara sang foulplay ang kamatayon sini.